Jáson draugur (Hvalsnes)

áson hét unglingspiltur einn, heldur fáráðlingur með stóru skarði í efri vörinni og öðru minna í neðri vörinni. Þessi Jáson andaðist og var grafinn að Hvalsnesskirkju. Þá bjó sá maður í Glaumbæ í Stafneshverfinu er Þórarinn hét. Séra Gestur að Hvalsnesi kom út úr bænum um vökuna og sér hvar tveir menn eru að glíma í kirkjugarðinum. Prestur gengur þangað og sér hvað um er að vera; er þar Þórarinn og Jáson nærri því búinn að drepa hann. Prestur bjargaði Þórarni og kom Jásyni frá honum. Þórarinn hafði vakið Jáson upp og sent hann eftir peningum; var hann þá aftur kominn. Sagt er að síra Gestur muni hafa tekið til sín megnið af peningunum. Þórarinn bjó í Glaumbæ eftir þetta og hét Ingibjörg kona hans. Oft féll hann niður með froðufalli þegar hann var inni, vakandi sem sofandi, en áður en hann fékk köstin sá Ingibjörg altíð skyggja fyrir gluggann, en aldrei fékk hann þau er hann var á gangi.